नाशिक (2024-11-25) - पंचवटी परिसरातील बिडी कामगार नगर येथे काल रात्री १० ते १०:३० च्या दरम्यान विशांत भोये नामक २९ वर्षीय युवक मित्रांसोबत गप्पा मारत उभा असता अचानक काही महिला तेथे आल्या व त्यांनी युवकाच्या डोळ्यात मिरची पूड फेकली. त्यानंतर ८-१० जणांच्या टोळक्याने विशांतवर हल्ला केला. त्यातील एक संशयीतने कोयत्याने विशांतच्या छातीवर वर केला. त्यामुळे विशांत जमिनीवर कोसळला.

त्याच्या मित्रांनी तत्काळ त्याला उपचारार्थ एका खाजगी रुग्णालयात नेले. परंतु वर्मी घाव लागल्याने डॉक्टरांनी त्यास मृत घोषित केले. दोन दिवसांपूर्वी लहान मुलांच्या किरकोळ कारणावरून वाद झाला होता, त्यातून हा खून झाल्याची चर्चा परिसरातील नगरिणकामध्ये होती.

याप्रकरणी अडगाव पोलिस ठाण्यात गुन्हा दाखल झाला असून पोलिस पुढील तपास करत आहेत.