मिरज (सांगली) (१ डिसेंबर २०२५) - आंतरराष्ट्रीय मानवाधिकार संघटनेतर्फे (International Human Rights Organization) १० डिसेंबर २०२५ रोजी मिरज पंचायत समितीच्या सभागृहात जागतिक मानवाधिकार दिन उत्साहात आणि विविध कार्यक्रमांच्या माध्यमातून साजरा करण्यात येणार आहे. मानवाधिकाराबाबत नागरिकांमध्ये जागरूकता वाढवण्याच्या उद्देशाने हा कार्यक्रम आयोजित करण्यात आला आहे.

प्रमुख उपस्थिती आणि मार्गदर्शन -
कार्यक्रमाचे प्रमुख पाहुणे म्हणून सांगली जिल्हा परिषदेचे मा. मुख्य कार्यकारी अधिकारी विशाल नरवाडे साहेब उपस्थित राहणार आहेत. संघटनेतील सदस्यांसाठी या कार्यक्रमात प्रबोधनपर मार्गदर्शन सत्राचे आयोजन करण्यात आले आहे. या मार्गदर्शनातून मानवाधिकार चळवळीला नवी दिशा मिळण्याची अपेक्षा आहे.

मान्यवरांचा पुरस्काराने सन्मान -
या विशेष दिनाचे औचित्य साधून समाजातील विविध क्षेत्रांत उल्लेखनीय कामगिरी करणाऱ्या मान्यवरांना पुरस्काराने सन्मानित करण्यात येणार आहे. त्यांच्या कार्याचा गौरव करून इतरांना प्रेरणा देणे हा यामागील मुख्य उद्देश आहे.

नियोजनासाठी बैठक संपन्न -
कार्यक्रमाच्या यशस्वी नियोजनासाठी आज (१ डिसेंबर २०२५) रोजी एक बैठक आयोजित करण्यात आली होती. या बैठकीला आंतरराष्ट्रीय मानवाधिकार संघटनेचे सांगली जिल्हा अध्यक्ष मा. अनवर इनामदार, जिल्हा प्रेस सेक्रेटरी गौस नदाफ, तसेच मिरज तालुका अध्यक्ष वसंत खांडेकर हे उपस्थित होते. बैठकीत कार्यक्रमाच्या रूपरेषेवर आणि तयारीवर चर्चा करण्यात आली.

नागरिकांना उपस्थित राहण्याचे आवाहन -
आंतरराष्ट्रीय मानवाधिकार संघटनेच्या जिल्हाध्यक्षांमार्फत सांगली जिल्ह्यातील सर्व नागरिकांना मानवाधिकाराबाबत अधिक जागरूकता वाढविण्यासाठी या कार्यक्रमास मोठ्या संख्येने उपस्थित राहण्याचे आवाहन करण्यात आले आहे.